اني كافر
ما اكتب شعر ..
ولا اطرب ويه الناس ..
ولا اخلي الگلب من غيرچ ..
ايعاشر ..
اشگد آنه اكتبت ..
بس مو شعر محسوب ..
ومن أكتبت عنچ ..
أي صرت شاعر ..!!
تغفه اگبال عينچ ..
كل الحچايات ..
وتفززهن ارموشچ ..
چن سحر ساحر ..!
اچذب من احبچ حب
مثل هالناس ..؟
حبي وياچ ..
ماظن بالبشر صاير ..
الطفل من يحب امه .. الفطره تبدي وياه
وتكبر يوم ، يوم .. وما يضل حاير
وأنه احتاريت بيچ ..
وبالكبر حبيت ..
بس چني طفل ، واكسر الف خاطر
ما چذب عليچ .. وعاشرت اشكال ..
انهي اليوم قصة ..
وابتدي اباچر ..
اواعد هاي هسه ..
وذيچ بعد ايام ..
وتمشي وياي وحده ، وثانية اتناطر
بس لمن لگيتچ كلشي بيه انهار
ردت بس گلبي اروضه ..
واني ما گادر ..
اذا اغسل اذنوبي ..
اباب گلبچ عود ..
هم ابقى آنه مذنب ، واعتبر كافر ..؟؟
**************************************************
