مجموعة ومضات روعة للشاعر سمير صبيح
كدامك طحت ما شفت وجهك كــــــام
هاك ابسط مثال وشوف وتصــــــــور
ولك خشبه بطبر فركست جف حطاب
من شافت حطب كدامها اتطبـــــــــــر
**********************
العمر ضاع العمر وياك يفـــــــــلان
ضنيتك وفي وخيبت الضنـــــــــون
ضنيتك نبع ما مره انســــــــــــــان
واجيت اطفي لهيبي بشوف العيون
شفت مايك كلت خليني عطشــــان
كرهت الماي من كثر اليشـــــربون
أذا ضنيت اردلك أنته غلطـــــــــان
يا دمعه الرضت ترجع للعيـــــــون
***************************
لمن رماني بسهـــــم
من سهمه ما دنكــت
ما طاح بيه السهـــم
ابضلي طاح وطحـت
*********************
فزاعه بحقل لتحطني مـــــــاريد
أساسي بطين ومخوف العصافير
بعد بس العدل وياي خليــــــــــه
خشبه وما رضت عوج البسامير
**********************
ما تيه ابدرب لو حتى ما ماشيــــــه
على دربي النجم بالليــــــــــل دلاني
وعلى فروة اسد ما تغفه عيني الليل
اذا مو فروته من صيد ذرعــــــــاني
وأخاف يغيب وجهي بطكت الجيلات
دور بالجثث وياها تلكــــــــــــــــاني
ما غرني اللبس لبسو عباة شيــوخ
أشم ريحة غنم بثياب رعيــــــــــاني
*************************
عودت روحي تون والونه صارت طرب
الناي لو ما يون جا حاله حال الكصــب
**************************************************
