حوار ديمقراطي
والعكس هو الصحيح
خالف للعرف تعرف ديمـــــــقراطي وبالك تلــتزم وأطـــــــــــبق القانون
فوت بفوضوية وحصــــــل شمتريد لتصدگ الــدولة تحاســـب يبوگون
ولتصدگ فتاوي موســــــمات بدين هم أهل التدين گامــــــــــوا يذبحون
حرية التصرف أنته مـــــــا مسؤول عن اللي تشوفه صــــير ماكو عيون
لا تنتقد غيرك صير ماكـــــــو لسان مرمه أسهام غيرك تصبح ومطعون
أنته براحتك أمشي ومثـــــــل متريد لا تمشي بطريق الناس بيه يمشون
لا تزرع أوراد بمشـتل الأيــــــــــــام بطرانين ذولــــــه الگاموا يزرعون
أنته تعيش باﭽـر وبأمانــــــــــة تنام لا اتابع أخـــــــبار أشكثر يتفجرون
حيطان البلـــــــــــــد مليانه أعلانات أكثر مــــــن بشرنه الأجو ينتخبون
حلوه أمبرمــــــــجه بوعود ﭽـذابات عرقوب أبتلعهن گبل مــــــا يوفون
يحـﭽـيلك مباديء والنــــطق معسول بس تطبيق مـــــــا تلگاهم يطبقون
حزنــــــــــــان الفگر متوسد الأوراق يرجال الفــــــــكر يل ﭽـنتم تنظرون
لــــو أنتوا بوكتنه جا رفضتوا الـناس ما شفناه بواقـــــــع هالفكر مقرون
غايات ومصالح نعـــــــــــرف الغايات وبشتى الوسائل لــــــيها يتوصلون
حكم الشعب فسر هالحـــــــــكم للـناس وشلون الشعب مــــركز قياده يكون
أخاف الحـﭽـي هندي والمثل مضروب والمعدان داخــــــوا بالذي يسمعون
شمهمودة بلطمها والقصـــــيدة تنوح ويه أزغار تاكل لــــو حصل ماعون
مو هاي الحقيقة يالديمـــــــــــقراطي لو أهل الــــشعر تخريب ينوصفون
لو لغوه حـﭽـيهم مـــــــــا يفيد الناس ﭽـا مدحوا وقدحوا مثـــل ما تردون
واحدهم بحر والبــــــــحر لا ميــصير بالتيار يغرگ خــــــــاف تتوهمون
ديمقراطي أمارس للفكر والقـــــــول مقرون بعمــــــل والوادم يشوفون
ونهييء وسيلة التوصل الغايـــــــات مو نـــــص الدرب بطلنه تعتذرون
هيـﭺ أنريد وادم ديمــــــــــــقراطيين من صلب العراق ورحمه ينولدون
الشاعر طه التميمي
