قصيدة مؤلمة جداً عنوانها الموت في الغربة... للشاعر المرحوم رحيم المالكي
ليـــش لوحدك من غير جناز........... وياهو الغسلك ويغمض العيون
غريب بنص محطة و واوادم أجناب ................ وهلك عنك بعيد شلون يدرون
اليموت بنص هلة تتهدل هدال................. عليه امه وخواته تطيح الامتون
وأشوفك وحدك وانت الكبل جان .................. الجبل والساتر بسدك يلوذون
ملك موتك أستعجل لو توانيت.................... ترد لديرتك جا هسة مدفون
ددليني بجوازك رايد اقراه ..................واشوف شصارلك بالغربة مسجون
من وحشة الغربة لوحشة الموت .................وشربت الوحشتين بفرد ماعون
عليك امك تعاين بلجن تعود................ وضعنك ما رجع من دون الضعون
عدمن ودعتهة وجيت ليجاي ................... وعليك تناشد ال يرحون ويجون
تريدك عون الهة لتالي الشيب................... وهسة انت ضعت وتريدلك عون
وحدك تنعي روحك جنك تـــــكول................ هلي يامن ضيعوني شلون ينسون
ال مثلك ما يموت وناسة تنسى .................العراق انت العزيز وتنسي شلون
يل حنت جروحك حنة الفاو .....................يل مدفي بقميصك حقل مجنون
يل بالهور دمك لسة موجود...................... ولسة بنهر جاسم بيك يحجون
المثلك ما يضل من غير جناز.............. النخل يطلع وراك وية اليشيعون
المن جابتك للغربة رجليك .....................ومتت لا ناعية ولا ناس يبجون
تكلي الجوع اكلك انت غلطان ..................العراق بخير بعدة ولسة مامون
صحيح الجوع كافر من يمر بيك ..............وانا مجربة واعرفة شلون ملعون
حافي وساوموني وكلت ما ابيع ...............وشلت غيرة هلي العشرين مليون
اثبت لا تهزك رعشة العوز.................... الشدايد صم صبر واتعدي وتهون
العراقي شما تلم بيه الملمات.................. جلد على النايبة وبالصبر مدهون
اذا ذيب الوكت ما ننكلب شاة................. ونتانيهة شوكت تكطعنة السنون
غدر طبع الذيابة وهذا معروف................. ومثل هاي النهاية المرة يردون
انا يا صاحبي راجع للعراق...................... اسولف قصتك للي يأشرون
اكلهم نهر ذلة ورة طريبيل.................... وانا خايف عليكم لا تغركون
الوطن هذا الوطن كل شبر محراب.............. كعبة ودنكوا يمة اليصلون
عراق ومنهو غيرك يرهم وياي .................وانا مطلك الدنية وعايف الكون
