ابوذيات في شجاعة ابو الفضل العباس علية السلام

نادت يبويه حسين
كريم الحاج فليح
نسألكم الدعاء

نادت يبويه حسيـن عمي البطل جاوين عمي البطل جاوين
موعنده وعد وياي يروح ويرد بالماي عمي البطل جاوين
ــــــــــــــــــــــــــ
سكنه بالخيمه وتتانـــي يرجع أمنالشاطي عمهــه
ساعه تسأل عنه زينب وساعه تسأل عنه أمهــــه
الضمه فطر كلبهـــــــه ويا مصيبتهه و هظمهـــه
بلجن يرد أبجربتـــــــه ومايه ويسكن المهــــــــــه
بلوعه وكلب مالوم وحسره وقهر وهموم وحسره وقهر وهموم
شما تسأل المظلوم دمعتهه تجري دموم وتغرك الخديــــــــن
ــــــــــــــــــــــــ
كصدت الوالدهه سكنه والعطش فطر جبدهـــــــه
عن كمر هاشم تسألـــه والدمع يجري عله خدهـه
للنهر راح وتعنـــــــــه و مارجع الهه ضمدهــــه
وين أبو فاضل عضيده وينه ماي البي وعدهــــه
حي بعده حي لومات ما ردلي أبو الكلفات ما ردلي أبو الكلفات
أكطع يبويه الياس من عمي العبـــــاس لو يرجع بهالحين
ـــــــــــــــــــــــ
كلهه ياسكنه يبويـــــه عالأكلج بي أصبــــــري
راح ابو الغيره يسكنه ونحنه لمصابــه ظهري
عالنهر فوك الوطيـــه عمج العباس مرمـــــــي
كطعـوا يساره ويمينه وفكده ناره بكلبي تسـري
وَجَه اليه وداع ووجهه نجفه عله الكاع ووجهه نجفه عله الكاع
وبحيرته وبلـــواه سلم عليه أبــــــاه من كطعوا الجفيــــــــن
ـــــــــــــــــــــــ

سكنه من سمعت أبوهه كلهه عمج مالـــــه رده
عالنهرأصبح رميــــــه والسهم من عينه عـــده
وللنبال الجربه صارت مرمه والبيهه تبـــــــده
ما أريد الماي نـــــادت بويه خذني هناك عنـده
يا بويه خذني ويــاك يمه أنوح هنــاك يمــه أنوح هنــاك
وبدمعة العينين أغسل دمه الجفين وبرحي أفدي الزين
ــــــــــــــــــــــــ
سمعت الحره العقيلـــه وصاحت أبونه خفيـــه
خويه ياعباس خويــــه من عسه نكطعت أديه
ومن عسه عيني الطفوهه وكبلك أنه بهالمنيــــــه
وريته جسمي اللي توذر و وجهي لتلكه الوطيه
ولن لطمت أعله الراس لمصيبة العباس لمصيبة العباس
ولطمت على الخدين وتنادي جاني منين وتعنه اليه البيـن
ـــــــــــــــــــــــــ
للغري لتفت عقيلــــــة هاشم وعدهه شكيـــــه
بدمعه وبحسره تنـادي حضرني ياحامي الحميه
وينك بهاي المصيبـــه ياعلي و وين الزجيــه
شوفوا عيلتكم يبويــــه بيا وضع وبيا رزيـــه
كبرك أنفظه وكوم وأحضرنه بويه اليوم وأحضرنه بويه اليوم
وشوف الجره والصار يا بويه يالكرار وشوف أهلك أمطاعين

جعلها بميزان حسناتك

ألف شكر لكَ على هذا الموضوع المميز