اللي يقولون ان القولون العصبي ما له علاج نهائي

قصه روعه واقعيه ..


صراع مع القولون .

السلام عليكم ورحمة الله وبركاته ..

انا اختكم بقولكم قصتي وانا في صراع مستمر مع القولون وبقولكم وش العلاج الللي ريحني منه

للأبد وفوق هذا كله بقولكم وش سبب طرحي لهالقصه مع انها تجيب لي انواع الحاله النفسيه ..


قبل يومين كنت بالمستشفى وبالأخص بقسم الطوارئ لظرف صحي مريت فيه ولفت انتباهي

صوت حرمه كبيره في السن وكانت المسكينه تبكي مثل العيال الصغار عورني قلبي ساعت

شفتها المسكينه وكانت معها بنتها وولدها وكانوا خايفين وينادون للدكتور وحالتهم حاله طبعاً

دخلوها غرفة تنويم 24ساعه ومن حسن الحظ اني نمت معها بنفس الغرفه وبعد تقريباً نص

ساعه ماعاد سمعت لهالعجوز صوت قمت من سريري وفتحت ستارتهم >>>ادري لقافه

بس والله انه كان القصد اني اتطمن عليها واعرف وش فيها الموهم سلمت على البنت

وسألتها عن الوالده قالت :لا الحمدلله هي بخير واحنا ديم متعودين على هالحال معها .


طبعاً انا استغربت وشكيت في نفس الوقت اني عرفت اللي فيها لأن وش اللي بيخلي

عجوز كبيره تلوى وتمسك معدتها وكأنها بتستفرغ غير هالقلون الله لايعيده ولا يعيد ايامه

علي رحت سألت البنت :ليش عسى ما شر وش فيها قالت ان عندها القولون العصبي

من فتره طويله وانهم تعبوا وما بقوا مستشفى ومالقوا لها حل


اول ما سمعتها قالت{ قولون عصبي }حسيت ان شريط حياتي الأوله مر علي فماكان

مني الا اني قلت الله يعينها ويشافيها من ما بلاها به قالت لي: ليش مر ت عليك

هالحاله >>>ناظرتها وابتسمت وقلت لها :انا ما مريت بس فيها قولي عايشت الحاله

مضبوط ورحت اقولها عن العلاج اللي تشافيت بعد الله عليه واللي بقوله لكم الحين..


انا بعد معاناتي لمدة ليست بالقصيره مع القولون عشت حياه اشبه بالكابوس كنت ممنوعه

من جميع المأكولات اللي احبها >>تخيلوا جميعها مو بعضها


اكلي مسلوق ومشوي بدون زيوت وبدون ملح زايد او بهارات الغازات محرمه علي وانواع الكاكاو

هذا كله وانا في بداية دخولي لعالم المراهقه حسيت اني عجوز بهيئة بنت انواع الحالات

النفسيه جاتني ما احب اروح للناس كله خوف من اني اتهور وأكل شي يحووس يومي علي

تلاقوني يوم بالبيت وعشره بالمستشفى >>>احس ما خلص ميزانيت المستشفى الا انا

الين في يوم من الايام شافتني وحده من اهل الجنوب الله يجزاها الجنه وكانت جارتي وشافتني

وانا اتلوى من الألم جاتني وقالت لي اذا حسيتي بالألم حطي يدك على مكان الالم وارقي

نفسك واقري وادعي وانتي حاطه يدك على مكان الألم مهما كانت شدة الألم وجابت لي

عسل سدر طبيعي ميه بالميه وحلفت لي انها جابته من المناحل اللي على الجبال في

الجنوب من عند اهلها وفعلأ انا عرضت العسل قبل لا استخدمه على كم شخص لهم خبره

بها الأمور وقالوا انه طبيعي لانه مايثلج اذا صار بفريزر وانه ماينقطع اذا صبيناه ووووو اشياء

كثيره والله مدري وش هي المهم وفترة شهر كامل صرت كل يوم الصبح آخذ ملعقه على

الريق وقبل اي شي وادعي ربي انه يكون لي فيها عافيه والحمد لله بعد شهر تقريباً بديت

احس بالعافيه ترجع لي شوي شوي صحيح اني كنت اعاني من حرارة العسل على الصبح

واحس بحرقان لكن والحمدلله والله يشهد علي بكل حرف كتبته ان طبي وعلاجي بعد الله

من القولون العصبي كان عسل السدر والرقيه ولله الحمد الحين انا لي فوق الخمس سنوات

ما أحس بأي اعراض وصرت آكل زي الناس واشرب اللي ابيه بدون ما اخاف وهذي قصتي

مع القولون والله يعافينا واياكم من كل سوء





منقووووووووول

موضوع في قمة الخيااال
طرحت فابدعت
دمت ودام عطائك