قصيدة الدنيا مو دنية عشك يا ابن الحلال
الدنيا مو دنية عشك يا ابن الحلال
او لا تخلينة ابمحبتك ننجبر
انتة ابن العافية وابن الدلال
واحنة ولد الموت ربانة الفقر
وبينة وبينك فرق كلش جبير
وما نكول اسباب كل هذا الفرق
وما نكمل السالفة لحد الاخير
امن الاساس اوياك مسدودة الطرق
اوياك ما نرهم وما ترهم محال
ويانة ما تكدر تدوم وتستمر
وياهو الكالك بالسهل درب الوصال
وانت تدري اكلوبنة امورثة جمر
امنين اجيت وبالعشك عندك يقين
امنين اجيت وياهو سوالك درب
انطيني مهلة وخل اشوفن وضعي زين
وخل اشوف النوب هم اكدر احب
كلبي تيهتة وشرد ما ادري وين
وانا صار اسنين ما عندي كلب
وخالي كلبك وانت بعيونك جمال
وكل جمال الكون يمك يعتذر
نبع شفتك يعني كلماتك زلال
والعطش بالروح تارك جم فطر
منين اجيبلك خلك يرهم عليك
وانت آية من الحسن واحلى الدلع
وآنه يافرحة الاحطها ابين اديك
وآنه بجفوفي عمر شلت الوجع
وحتى ماعندي ابتسامة من ارد اجيك
وليش تشلع كلبك بكلب انشلع
وليش تطلع خاسر ومشلول حال
وتترك الضحكة وعليمن تنقهر
راجع افكارك بعد عندك مجال
ليش بيه تريد كلبك ينكسر
ادري بيك تحبني ماداعي الكلام
وادري بدموعك صدك تبجيلي
من تجيني لاتكلمني بغرام
وعفية عوف الشوك لاتحجيلي
آنه ليلي بلاية واهس ماانام
شلون لو صرت انت واهس ليلي
وشلون لو حبيت شكلك والخصال
وشلون لو باجر تروح وتعتذر
هم ترد لمن اكللك تعال
وتنتظر لمن اكلك انتظر
الدنيا مو دنيا عشك ياابن الحلال
احنة عدنه الحب يعني الحب عذاب
ولازم من نحب نذب بالحب فلك
ولازم نحب باب بيتك والتراب
ونحب كلشي العايد وراجع الك
ونحب ناسك كلها الشيب وية الشباب
ولازم نحب كل عمامك وي هلك
ولازم نحبك نحب الخال خال
وكل هذني شوية لتكول شكثر
احنة ماعدنة العشك صفنه وخيال
احنة من نحب نطك وننفجر
الدنيا مو دنيا عشك ياابن الحلال
ونخاف من حبك لان حبك جديد
ذهب جنه وياهو اليشوفة انعجب
والمشاعر فقره معضدها حديد
وانت يم الفقره لطلع الذهب
وياك مانصقل بعد لا مانعيد
عوفنه ولتكول بينولي السبب
احنة ماعدنة جواب الأي سؤال
لان من شفناك تيهنه الفكر
هم شفت فد يوم كالو للدلال
ليش متحملة حضن نار الجمر
الدنيا مو دنيا عشك ياابن الحلال
ولاتخلينا بمحبتك ننجبر
للشاعر جبار رشيد
**************************************************
