ابيات ابو ذية للشاعرة وجدان الواسطي
اسكت تعب فكري كمت اخبط
مثل مجنون صاير بس اخبط
عندك جص بورك جيب اخبط
ضيعــت الاول والتالي عليه
****************************
يعني شلــــون كولي شنهـو حلاك
شسواك بعيــــني من عسل حلاك
ربطتك بيـــدي بس الضرف حلاك
ابـــــــد مـــا يرضه ربطتنه سويه
**********************
اظل للصاحب انــــــــــــه دوم شراي
ومن اليوم اعلنت خوتك و ش الراي
مـــــــا شــــــوفك يصاحب يـوم شري
بـــــت السواعد مـــــــــاترضه برديه
************************
جبرني الــــــــــوكت ابعد وداني
وجثره طعونة يا الاسمر ودني
احبك حـــــد كطـع نفسي وداني
وكتنه ومارضه نـــرجع سويه
************************
صبر ايوب اريـــــــــد اصبر وصابر
ولهمت المر لجلك والحنظل وصابر
انه مـــن زمان متــــــــــاذي وصابر
مثل هيجـــــي صبر ما مر عليه
*********************
يالشمري لا تلــومه ضرفه وهم بيه
واعـــــرفه بالكلفات نشمــي وهم بيه
لا تظــــــــــن بعشرته وياي وهم بيه
الضرف نصــــــب ساتر عليه وعليه
********************
عله المامش حسدني وي فلك طرة
هــــــدم حيلــي زماني بسيف طرة
حظ الناس كتبــــه وحظـــــي طرة
نخلـــــهه هــــــواي مافيت عليه
****************
البيتك ما اظــن ادخـل ولاطب
وجرح الكلب مافـــاده ولاطب
النكر طيبي مذكــرله ولا طيب
ولا ريدة بعـــد يكــــرب عليه
**************
لون اكتب ما خصص ولاعم
بهاي الدنيـــه ماظلي ولاعم
تبعت الوكت بضعونة ولاعم
يميل الوكت روحي تميل بيه
*******************
ولا ذميــــت صاحب ولهجيته
تركـــت الروح عنده ولهجيته
سمعت يومين غايب ولهجيته
يطمــــــــني وترد الروح بيه
********************
زحف مــو ممشه روحـــي واسطيه
ردتك حبيبي عيـــــون اليه واسطيه
احب اهــــل بغداد والشمال واسطيه
بس انـــــي الجنـــــوبي يعيـش بيه
*********************
حجي العـــــــدل مـــاله مات نصه
كلبي مــــــن الــــردي مــات نصه
ساعـــــديه راسي عــالي ماتنصه
وراسك والارض اسحكهن سويه
***************
تشك بالكـــون كـــــوله وبيه متشك
عجــب تظلمني انته سهامي متشك
مستواك فوك العين و الراس متشك
اكوص السانـي لــــــو جابك برديه
*******************
عيـــــون الدنيه تبجيلي دمـوعاي
الدمـــع نهــران بخدودي دموعاي
هلي الدمــــــع مرخوصه دموعاي
اصب ونزلت عيـــــــــــوني بديه
************
كـــول التريده ايصير تامــر جرالك
ما اكـــــــول الاه لــو دمعي جرالك
واصبرعله المكتوب من الله جرالك
وسفه الدهـــــــر شمت اعداي بيه
**************************************
يعني شلون اعمــم ماينفع ولا خاص
ولا بيه بعــــــــــــد اكتب ولا خاص
واخــــــــــــر ما راح اكوله ولخص
راح اطلـــــــع ونهـــــــــي القضيه
***********************
روحي والهوه والجـــــــــرح وعدي
وعلي منهـــــــــو يشيل الالم وعدي
طالع ونتظر مــــــــــــــن الله وعدي
ابفرح لـــــــــو دوم وكتي بغم عليه
***********************************
علي كلفــــات ذب الدهــــــر بينه
وحط جـــــروح وسط الكلب بينه
ولامـــــرة نصحنــــه واجت بينه
وعـــــرفك يا زمن حاقــــد عليه
***************************
رسمت الحـب طريجي وياه حده
وعلي الـــوكت شايل سيفه حده
شلون انسه عشرته وكلبي حده
حلف يوصله لـــــو يكلف عليه
*********************
هاي احـــزاني مـــــــن وراك
جنــــــــت بالعتمه انه منوراك
عرفت الهــــوه ضدي منوراك
شامـــــت حسدني وعم عليه
**************
واو وجيـــــم ودال والف وي نون
يغلبن كل شخص لو راح وي نون
انه الجنــت افيـــي وفيي وي نون
في اشجار طيبه مـــــــــــــو اليه
*****************
حروفي تبعثرن بالكلب يرحين
نقصن مـا اظـــن للجمع يرحن
صحيــح القسمة العذال يرحن
والزائد تــركني وخـــــان بيه
*****************
تعال انصـــــب يصاحب ماتمنه
بعد غـيــــــر المفارك مــا تمنه
كتلني وجـــــــاي يجمع ماتمنه
التبعثر مـــوسهل جمعه سويه
*****************************
الك بالــــــود كتب قلمي ولك در
وفرشنه العين بحضورك ولك دار
عمت عينه الوكت طكك ولك دار
ودفن فـــــرحة شبابك بالمنيه
**********************
بشوفه تخجـــــــــل انضاري وداري
بشعره المــــــــــــح طيـوفي وداري
يريت يصيـــر داره كـــــــرب داري
ورد انه التحيـــه بكــــــول مسيه
*******************
عشكة انه ضكـــت طعمه حيل مالح
وبعد كــــــــافي يدنــيه بحــبه مالح
الورد يموت لـون يسكوه ماي مالح
مــــــــــو صافي خبـــط ميــة عليه
*************************
الكلبه قسه مــا غيـــرة كراهة
وابو طبـــع ميتــــروض كراهة
عجب محبتــــي صارت كراهة
اشبده مني وتشمت اعداي بيه
***************
لون تعــــــرف البينه ما لمتنه
تروط الكـــــاع تحتي ما لمتنه
توسدت همـومي بديه مالمتنه
صفه للغــير متنـــه موش اليه
**************************************************
