من اروع القصائد للشاعر عبد الامير الفتلاوي
أصفـــج بيد ماني مهيد طول الليل ... ماضل حال ليه او راح مني الحيل
*
مني الحيل راح او لابقــالي حــــــــال ... اجاني او كال اجيتك لا تكول اغفال
طعني او طاح رمحه او صاب بالدلال ... كتله ادخيل كال اليوم ماكو ادخيل
*
ماكو ادخيل عاني ليك ما هــو بوك ... يصيد اهواك ونته الطير بالجو فوك
كتله ارحم حنيني اعليك حن النوك ... والمـــــدمع يسيل اعليك كت السيل
*
كت السيل دمعي سال بالــــوديـــان ... غط البيد والشط ماح من حوران
وحك الطور والمسطور والرحمن ... ماظنيت وعـدك ليش عنه اتميل
*
عنه اتميل وعدك ليش بيه اتخون ... مدفـــع فاتح النهرين عــنده اعيون
لا وتكول سم الركط والطـــاعون ... بيهن موت واليعرض يصير اجتيل
*
اجتيل ايصير بعيونه سهم ميشوم ... منه انصاب دلالي او كرهت النوم
اله مبسم يمتعب ليلو ومنظوم ... اي والاجد التورات والانجيل
*
والانجـــيل والـتـــورات سمح اجعـــود ... عنده عين زركت عين حر اصيود
ابدجله اوشبل والمشخاب وبن اسعود ... او بالمنتفج والسراي ماله امثيل
*
ماله امثيل بالعربان وهــل الــــــدور ... عانه اوهيت فوك ادليم والخابور
ملك الغيد هل مسكون بس بالحور ... منه او اه واويلاه صرت انحيل
*
صرت انحيل بعتيبه او حرب ومطير ... لا مشيوف لا بالحي ولا بالـــديــــر
حتى اقرع جليحه اوعفج وال ابــدير ... او حتى اكريش فوك ازبيد وهل النيل
*
لا بالنيل لا شــــوملي وعــــذار ... ولا عند جبور او حسجة الفوار
ابن خيون وحويزه او شط الكار ... لا بالكـوت وعماره وهل جندبل
*
بهــــل جـــنديل ما صاير ولا اتصور ... او حاجب اه شبه اهلال المقنطر
عفيه اجعود بيهن كام يتعثر ابظلمه الليل ... عــــنده اخــــدود بـــــرق اسهـــيل
*
برق اسهيل بخدوده او شفت سدره ... امشذر هيج ما يحصل مثل شذره
ابشاميه او سماوه اومركز البصره ... ولا عند الخزاعل وعنزه وعكيل
*
عند عكيل ما يحصل ولا يوجد ... ابهنديه او حله او كربله او مشهد
يمتعب بالعشاير وصف اله محد ... حتى اكـــريط فـــتله لا ولا بطفـــيل
*
عند اطفيل ما يحصل ولا زيـــــاد ... لا بالبــــيد لا يمــــــكن بعــــد ببـــــلاد
بطــــويريـــج ومسيب وهل بغـــداد ... او سامره اوجسر حربه اوبهالي ادجيل
*
لابـــدجيل صار ولا جناه اعـــراق ... يا خلخـــــال الميسر ابـــــذاك الساق
لا وهــــواه لا والسيــــد الشراق ... غيره اتعيش كلبي ماهوه ابهل جيل
رحم الله شعرانا الماظين وحفظ الباقين
**************************************************
