أمنيات شاعر
الشاعر / حسين البهادلي
واسط
أمنيتي يا موطني .. من أصعد اني الصبح .. أبسياره عبريه
ما احب سياسه استمع .. واشكثر من الشعب .. أيموتون يوميه
أمنيتي يا موطني .. الفيروز كون الصبح .. أني اسمع أغنيه
وبالأخص كون استمع .. ( نسم علينه الهوه ) .. وكل ساع حتى أظل ..
أرجع عليهه اردود
بلكن بعد يستحي .. ومينسم البارود
وأيرد هذاك النخل .. الشايل الناسه تمر ..وفوگاه فيّ السعف
ونزرع حديقة ورد .. أبنصهه نحط محكمه .. واعدام يا موطني .. تنحكم كل السرف
أمنيتي حتى الطلق .. أنغيره بأجمل صوت .. حتى اليجي أبواجبه ..
ومجبور عألي سطه .. يرميله طلقه أريد
جيرانه لمّن يفز .. يستمع لأجمل صوت .. موسيقى لو تغريد
وأتخيل أنت بعد .. من تدخل أنت أبحرب .. وبالحرب تدري القصف ..
ما يرحم الطفله
بس صدّك أشما كثر .. صوت الحرب بالقصف .. مدگول داخل حرب ..
چن داخل أبحفله
وخاطر يرد الشعب .. متروس ماعونه
لازم نطبق حچي .. عبد الكريم الگال .. زغـّر الصوره الألي .. وكبـّر الصمونه
وأني أدري هذا الحچي .. من عنده يزعل راح .. القائد البارع
بس أنت صدّك اذا .. زغرنـّه كل الصوّر .. ما تبقى يا موطني .. أمجديه بالشارع
وأمنيتي يا موطني .. أن أرجع البيتي
وأمنيتي يا موطني .. لمّن أسولف بعد .. ما أكولاً أمنيتي
**************************************************
