كون اتشوف للشاعر جبار رشيد
عفت كلشي ...وجبت كلشي
ومدري شلون اجيت امشي ..
أجيتك ردت اگلك شوف ...
ردنه نعوف كلشي وماگدرنه نعوف
كون اتشوف حالي اشگد الك ملهوف ؟..
******
جبت كلشي اليسولف بيك
خيالي وصحوتي وطيوف
جبت دگات گلبي الگطّعن گلبي بجفاك اسيوف
جبت صفنات روحي
السودنت روحي .....
مثل جنّ ابمسيّه وعاليتيمه ايحوف
كون اتشوف ...........
بشفافي الحزن ماخلّه بسمه تعيش
وكلمن كمت ابوسه بخده اطبع اوف
كون اتشوف ..........
دموع الجدم مايدري وين يروح
والخطوات عميه
وتايهه ابلاشوف
كون اتشوف ....
..خلّصت الوجوه وشفت كل الناس
كلهه وجوه غربه ولا وجه معروف
وين الگاك..
يالموصوف اليه و آنه الك موصوف ؟...
يلفرگاك غربه وكلشي مامألوف ...
انه بلياك مدري شبيه مابيه ..
زلف وبلايه ترچيه ...
درب مابيه كل جيه...
نهر فاض وتبع ميه
رجع بس مالگاله اجروف
كون اتشوف
روحي شخله بيها الخوف
مطلوبة نذر وتخاف ...
ماتوصل حضرتك
من بعيـــــــــــــــــــــــــــد اتطوف
******
كون اتشوف
روحي شخله بيهه الخوف
مثل دمع العروس الجايّه اعله اجناب
وايصبّر عليهه
وجابهه الزافوف
*****
وشوف اشخله بي الخوف
مثل حلّة مدارس
روحي احسهه اطفال
حلّت وتركتني ...
وباقي بس صفوف
******
ويا وحشة صفوفي ومن يجيني الليل
ويالون الوجه
بعدك الضل مخطوف
***
ويا قسوة ضنوني الماتريد ارتاح
وانه الصاير اسير
وبيدهن مجتوف
...
كون الگاك واشكيلك
على جروحي الگيت
الغشمه بيهه تروف
وكون الگاك وابجيلك واسوي خدودي سبوره
ودمعتي حروف
وكون الگاك واحجيلك
بكتاب السنين انحذف كلشي الچان
بس اسمك لگيته الباقي مامحذوف
واذكرك من مسحت دموعي
باخر يوم
على خدودي
أحس لهسه طبع اجفوف
******
وكون اتشوف
اعيوني مضيف تصير وكت النوم
وهلبت بالحلم لنك
تجينه ضيوف
كون ا تشوف حالي
شكد الك ملــــــــــــــــــــــــــــــــهــوف
**************************************************
