يالبعدك طفل .. وشجـابك اعــله الضيم
يالبعدك طفل .. وشجـابك اعــله الضيم
وك .. نقمه العشك مــن كالك نعمه
جايب شفـتك .. ودور اعـله اشفـــاي
وشفافـــك خطـيه .. ادور الممه
تكلي انطيني كلمه .. انطيك كلشي تريد
وعلى الاحوط وجوبا تـــرك هالكلمه
احبك ما اكلك .. بـس اكلك ليش
لان حب الورد معنــاها نشتمه
وياممنـــوع لمسك انت بس للشوف
طبع .. جنح الفراشــه اتفـــرهده اللزمه
وايدك من ثلج .. وجفــوفي حـــر تموز
تبدي الماي ليــش ونعـــجز انلمه
ياشسمه .. لحلاتك قاصــره الاسماء
وبدقة اوصـافك ســـودنت شسمه!
للقمه حلم توصـل محـــاسن ناس
بس انت الوحــيد انولد عالقمه
امس بلبل خبصنه ومن سمعلك صوت
صاح اهووووو مداني وكتلته الغمه
ويالمرهدن ترافه وكـلشي يلمـع بيك
يعني امك شمس .. لـو خالتك نجمه؟
احط الحور يمك مــا اعاين حور
قياسا بيك .. عمــي .. وداعتك زلمه
يتنافض غواك مـــن الجدم للراس
وعطر سنبل دلالك ســـكـر النسمه
مناجل عين ناسك .. والخلك فلاح
وجم تشرين اجــاك ومطرته بفمه
ظل مروتك لاتطــلع من البيت
ماتدري البراءة اتعـــاني من ازمه
بس عندك حلك والعـــدنه موش حلوك
مجرد فتحه منها انعبر اللكمه
**************************************************
