سامحتك قصيده للشاعر ناظم الحاشي
ياعمر الفراشه البربعينه يضيع
مجبور العمر وياك ضيعته
كلبي اعله العشك مارهم بي مفتاح
مفتاحك عليه شلون رهمته
شعره البعقل عتيتته من سنين
الجانت للعقل وياك لازمته
معذور اليحبك لو كفر بهواك
ولو حبك نبي هم جان كفرته
بلبل عالغصن كلبي وشمرته احجار
ومكسور الجنح للكاع طيحته
خليته بقفص وتعرفه ياكل تين
جاع وخبز يابس كمت وكلته
وتعلم عليك وكام من يطير
يرجع للقفص ملهوف علمته
ومن عاشرت ذيب وكالك جوعان
وجبه البلبل المسكين قدمته
ورحت اتصيد ثاني بكل وكاحه عين
والاول بالقفص منصوبه فاتحته
كفيت العتب ماعاتبك عالصار
وشيفيد النفخ بالنار حاركته
ياحلم الطفوله الصرخ بذنه الشوك
عاف اهل الوفه وصدكك من صحته
حب رباني حبك مكتفي الغايات
وشيطانك دعاني ومارحت شفته
يااول نهر يحترك بالتاريخ
طلعت ريحته ومايوم جذبته
وانت اول ضمير بنص مزاد انباع
ويااول حلك ياكل لحم خاصرته
سامحتك رغم كل الصفات البيك
يااول شمر بالكون سامحته
**************************************************
