شعر شعبي عراقي دارميـــــــــــــــــــــــــــــــــــــات
مرخوص كل عضاي تسحك عليه
بس لا تدوس الروح جيف انته بيه
*****
ها روحي نص الليل ها شوكعدتي
حكج مالوم عليج لنج ذكرتي
*****
الميت أشمدريه بليمشي جناز
لاجن طبع بالروح تمشي ويلعزاز
*****
سم لو خنك تردين روحي ارد اشيرج
من عكب طاري هواج شنهي مصيرج
*****
ياروحي لا تآمنين بلمتجي والبيج
هو اليدك اطبول هو اليخزيج
*****
اشما ثكل ترتاح روحي بحمله
شالته ونهضت بيه جا شامت اله
*****
آني بغزير الماي روحي ارد اذبه
ويتبين الكراه من اليحبه
*****
ماهمتش بالموت روحي من اجاه
همت بطيب الذات من ظل وراه
*****
أبهيده وي الروح لا تكصي بيه
ماتحمل اللجمات شلك عليه
*****
شنهو تريده الروح شنهو الترافه
لاهي تريد الموت لاهي تعافه
*****
يهديه حشي الروح جملي شجالج
الزرع وأهله يروح فدوه الخيالج
*****
أطلك ولأطلك بيه يطلكله بتوم
عسروا بسط الروح كلهم فرد يوم
*****
روحي أشتهت ملكاك ياناكر الطيب
ماغزر وياك طبعك طبع ذيب
*****
اله وتغمج بيه روحي تحفر بير
حفرته وطاحت بيه وياها بالجير
*****
لشرك اضلوعي اثنين بيهن واخليج
بلجي تهجع وتنام روحي أتهم بيج
*****
مو حك تريد الصير ماصخ يمملوح
ماتقبل تعاديك آني ادري بالروح
*****
بسيان آذبه الروح واسحك عليه
ماحظت بالطيبين جاشلي بيه
*****
أصنت الروحي وشوف دكته تكطيع
ساعه بنفسه اسوك ساعه الهوه يضيع
*****
زين أنته عندك روح تصنت آله
لا نفس لا تكطيع روحي أسمعله
*****
نهضت ومابيهاش روحي عله الوداع
سار الضعن وبكيت ابحث عله الكاع
*****
آخ شكثر عل آخ متعلمه هل الروح
حته بفرح نوبات من تطرب أتنوح
*****
بسمك صحت وأوميت وعليك أنادي
وصحت بعزيز الروح ريض يحادي
*****
ياهم تشيله الروح ياهم تحطه
كلما أصفي الماي دهري يخبطه
*****
جثر عذاب الروح آنه ارضه يهواي
بالحشر بلجي يطول موكافك وياي
*****
يتردس عله الروح حسبتهن بعيد
روحي اشتهت ملكاك خبزة مجاريد
*****
روحي اشتهت ملكاك نيته ترتاح
اتفكدك مبخوت كل مسه ومصباح
*****
جدح النوال الجاج ياروحي رديه
خافن أهله يشحون واتعود عليه
*****
ما ردت اجيك الروح جابتني كوه
جيه لن اشمن بيك ريحة الخوه
*****
عكرب تريد اتصير تلسعني وتروح
حسبالي خوش وليد سلمتك الروح
*****
ولما تريده الروح كشمرته بلوه
مثل ألينحر الماي كوه عله علوه
*****
كلما ارد أعذل الروح وامنع وصله
يهتز لعد طرواك سباح اصله
*****
أهنا يمن ضحيت ابروحي دونك
هم تنشره وتنباع جلمة اشلونك
*****
آوهمداهه الروح غمه عله هالراي
أمن السراب تريد تسجي وتهد ماي
*****
مابيّ اصبر الروح من يجبل هواي
مثل السعف بالريح تتراجف عضاي
*****
اصبحة بيه اليوم عله اشكبره
وانهجم بيت الروح مكثر صبره
*****
شمالك تشح بهواك وتعذب الروح
شوف الكلب تلكاه مرتع للجروح
*****
من روحي تطلع روح تطلع ورده
والصبر بس وياي جزاه حده
*****
روحي بروحك ياروحي روحين بروح
من راحت روحك ياروحي روحي بتروح
*****
شلونك شلون الدار وشلون الأحباب
أهجس جرح بالروح بشرني ما طاب
*****
يدي دمع شوغات جرحي فلا طاب
ويل تنشد عله الروح خانوه الأحباب
**************************************************
