دارميات مختكه روحي
حته الهوه ابلياك مخنوك احسه!
حاولت كون انساك ما اكدر انسه!
مختنكه روحي اشلون؟ راح اشرح اشلون
مثل الوراه اعدام والهسه مسجون!
مختنكه روحك ليش عالمايوافون
لو جانوا ايحبون جا ما يهجرون!
مختنكه هاي الروح خنكة يتيمه
تستنضر افضالات بعد العزيمه!
مختنكه روحي اليوم رادت هواهم
عافوها لشمات مدري شجاهم!
مختنكه روحي اليوم بس الله يدري
عالما رجعلي وعاف دمعاتي تجري!
مختنكه روحي اهواي عالما اشوفه
لا بيه امرله ابيوم لا بيه اعوفه!
ريم ومرام اليوم صفن سويه
خنكن بقايا الروح هاي المسيه!
مختنكه روحي اتنوح نوح اليتامه
تنتظر يمته ايصير يوم القيامه!
مختنكه روحي اشبيك لحك عليه
لوما تجيني ابساع الكه المنيه!
مختنكه روحي اعليك وينك حبيبي
اخر جرح بالروح حَير طبيبي!
مختنكه والعباس روحي الجريحه
عافوها بين الناس مثل الذبيحه!
كالوي روحك ليش تسئل عليها!
من بعد ذاك الراح شتسوي بيها!-
حسين االساعدي
**************************************************
