خليك لتحس بذنب وأنه اعتبرني العفتك
( بعد أن تركها بدون ان يبرر لها وتزوج من بنت عمه التقاها صدفه بعد مرور سنتين في حفل عيد ميلاد ابنته ومعها هديه )
فقالت لهُ :
خليك لتحس بذنب وأنه اعتبرني العفتك
واوگفلي يادمعي انتظر لا ننفضح مو وكتك
لعابه كل يوم أشتري لبتنه الولا صارت صدگ
يا فشله أجدامي الأجت نگلت هدايا لبنتك
يالطولت بأخر زعل
تانيت اشوفك منخطب مو تضحك انت ومرتك
حاچيني بألبوم الصور
ولا صوره منهن حركت وجدانك وعاطفتك
يخطر على البال النعش
بالغيبه يخطر بس ولا فد يوم خطرت زفتك
الناس ما تعذر محب لو تعذر ألطم عالوجه
من هيچ شفتك واتضح چنت أنه بس صاحبتك
يالفاجأتني تفاجأت ؟ وجدانك انت شكم جزء
چنت احچي عنك من كثر ما حسبت حافظتك
لتشيل أيدك وأنتبه
وأتذكر أنه شگد شلت من عمري خاطر شلتك
يا زين يا مجرى الصدگ حيل أنت متغير لأن
من چان يربطنه الحچي شگد ماي چان بگصتك
چنت الحنينة التنعشگ
التفهم گبل لا ينفتح موضوعك وسالفتك
چنت الحنينة التنچفي لحـنيه المخلفتك
ياكبر جرحك مو سهل
بيه موت حب وبيه ذنب
يراد چادر ينصب مو مالت مزاعلتك
الرادوني كلهم عرسوا وسنتين مرن عالبعد
ولحد گبل لا تنفضح يالمو كفو مناطرتك
حاچيني يالخنت الوعد
غير أم جهالك والذنب يا ناس شلت بذمتك ؟
أتخيل أنت وبالعكس وبنيه ممكن تنجبر
ينطوهه أهلهة لأي شخص وتصير مو من حصتك
شيصير حالك ؟ وأنعذر ؟ لو تعتبرني الخنتك؟
يا ساعه البيضه الطفت
يا وسفه اگلك بالوجه ساعه السودة الشفتك
ما ادري ليش بهالوضع
ما چني عالباب أوگفت چن واگفه بفاتحتك
خليك لتحس بذنب
كمل حياتك وأبتسم وانكتني من ذاكرتك
يوسف_الساعدي
**************************************************
