ابو جبار شيخ عشيرة
ابو جبار شيخ عشيرة اخذله واحد من جماعته وسيّر بالليل على عشيرة ثانية وجان الوكت شته ، تعللوا ومن رجعوا بنص الدرب طگهم مشهاب برد لا يگدرون يرجعون لأن زحمة ولا يگدرون يكملون من البرد والهوى بوجوهم. فالشيخ گال للوياه : ولك احنه اذا انكمل انموت من البرد شوفنا صرفة ؟..
گاله محفوظ ماكو غير نروح على عويد من عربنا وخيمته جريبة علينه...
الشيخ گاله هاي هيه... راحوا على عويد ورحب بيهم وشعللهم النار وسوالهم چاي. ..ومن هفتت النار گالوله عويد انريد انام ....عندك فراش عندك غطا. ؟...گاله لا والله محفوظ ما عندي بس ازار ومتغطين بيه آنه والمرة والفروخ .!! ...گاله الشيخ خوش روح نام . واحنه نلتف كلمن بهدومه.
نص الليل الشيخ گال للوياه. :.عيني ما تاخذ نوم من البرد ،، صيح عليه هذا منعول الوالدين ما عنده بطانية زايدة لحيف ؟...فالوياه صاح: ولك عويد ما عندك بطانية لحيف للشيخ. ...عويد گاله لا والله بس الازار ومتغطين بيه انه والعويل.
الشيخ گاله ولك تذكر مناه مناه.. ..فعويد تذكر گاله محفوظ عندي اجلال المطي انطيك اياه. ؟...الشيخ گاله : انچب ولك . ورجع نام !! ...الشيخ والوياه ما گدروا ينامون والليل بعده طويل. ...هم رجع وصاح على عويد . وگاله: ولك تذكر انريد شي نتغطى بيه من البرد ....فعويد وهو حدر الازار صاح : لا والله محفوط بس اجلال المطي اجيبه الكم .....الشيخ گاله انچب ولك . ورجع نام. ...فهو بينه وبين نفسه بوده يتغطى باجلال المطي بس خاف من عويد يسولف ويگول غطيت الشيخ باجلال المطي .
ظلوا الجماعة يتگلبون وهم ما گدروا ينامون .فصاح و گله ولك تذكر بلكي تلگانه شي .!!
عويد گاله محفوظ وداعتك ماكو غير اجلال المطي اجيبه ؟
فالشيخ طگت روحه وصار عصبي وگاله. ابن الجلب بدّل اسمه وجيبه مو ذبحتنه !!!
الانتخابات على الابواب ومفوضية الانتخابات غير مستقلة داخلة بالمحاصصة الحزبية .وقوانين الانتخابات مفصلة على مقاسات الاحزاب . وتم تبديل اجلال المطي بالتحالفات الجديدة . فما باقي على هذا الشعب المسكين ان يتغطى 4 سنوات قادمة تحت نفس اجلال المطي اجلكم الله ولكن ب غير اسم ...ويحيى الشعب ويحيى عويد.
**************************************************
