[لالي مثل چيس ابيض ولك شاف
وعونه الكحّل عيونه والك شاف
الك مبسم يفت روحي والك شاف
مرج بحرين وتلاگن سويه
شكثر حاچيت گلبي عظ عضيته
وصبعي من الندامه عظ عضيته
طمعت بشفاف ولفي وعظ عضيته
موطا بحلگ جاهل صفت هيه
أضل بشفافچ الحلوات مسبي
وجن العگل بيچ وصار مس بيه
قلم حمره يريت الگلب مس بيه
روحه بشفتچ وذابن سويه
مزنجر قفل گلبي عليك شفتك
تبريّد حيلي والله بيوم شفتك
سبحان الرسم عالوجه شفتك
الحلاه خلاها الك والضيم اليه
حبيبي من حلاها مره شفتك
وبعد عطشان يا سمر من رشفتك
لون فد يوم تصدف مره شفتك
جدك ما يخلصك من اديه
عليل شكثر گلبي بس تشافه
على الجسمه يلالي بس تشافه
بحلم غافلت ولفي وبست أشافه
أنتبهت الروحي أمص بچفوف أديه
أصد لبعيد أعاين شفته لاله
على الفانوس وجهه وشفته لاله
أهيس وسط شفتي شفته .... لا لا
ورد جوري أضن موشفه هيه
تهشم راس گلبي بيه هشم بيك
أخباري ماتسرك بيها شنبيك
ثغر شفتك حبيبي بيها أشم بيك
ريحة خوخ فاتح للشهيه
أحملت غصبن عليه جور أبيها
ودنيتي شكثر شايف جور بيها
الباري بشفته خلّه جوري بيها
لأن كل ما اشمها تفوح هيه
بالحر والصحابه أقسمت مع جون
گلبي ويالهموم العليّ معجون
طماطه شفافچ الحلوات ...معجون؟؟؟!
الزمتهن صارت الحمره بديه
شفافك هذن يمدلل يلا تين
شكر طعّمهن الباري يلاتين
لاعد عرب موجوده يلا تين
گالوا عد حواري العين هيه
بحر نار آنه وانته يم شفاهي
وأنا بدوني حبيبي يمشي فاهي
لون دنيت شفتك يم شفاهي
أموت وعمري صاير ثلثميه]
