ايكَولون!!!!
ايكَولون باجر شمس تطلع على الديره
ويمر قطار العرس ياخذ نواطيره
ونتعلم البسمات
ونودع الدمعات
ويروح ضيم الأمس هوَ وتصاويره
ايكَولون باجر شمس تطلع على الديره
-----
وين الله ننسه القهر ياواحة الامال
من بعد ذاك الصبر تتعدل الاحوال!
ياليل جيب الصدى من يصدح الموال
وَصلَه ومضة أمل للعايش ابحيره
ايكَولون باجر شمس تطلع على الديره
-----
ماله مضيف الكرم شو دمعته ابعينه
ابلا كَهوة بس الدمع تارس فناجينه!
يازمن وك يازمن للماضي رد بينه
الريحة اَهلنه وطن طار ابجنح طيره
ايكَولون باجر شمس تطلع على الديره
-----
واقع وَكِتنه وَكِح عالمنه مو عالم
المظلوم من انذبح صَفكَوا للظالم
والفوز للما نجح! والدمعة للفاهم!
والضحكة طلعت جذب وانغشت الليره
ايكَولون باجر شمس تطلع على الديره
-----
ايكَولون باجر شمس تطلع على الديره
ويمر قطار العرس ياخذ نواطيره
الشاعر حسين الساعدي
**************************************************
