حتى الوطن من شافنه ابهلحال
مثل والد عليل اتعاركو ولده
اشتفرق ينكتل قابيل لو هابيل
آدم بالنتيجه الينمرد چبده
اوياجار اليحشمه اويدري بالجيران
تتأسف عليه اوتشتغل ضده
اذا مايهده تهده اوتفرح اوترتاح
اوماتهده دقيقه امنلوضع يهده
باوع للدول والناس وصلت وين
وحنه ابهلخلاف انجيبه ونرده
مسرحنه زهك ماشاف غير ادوار
مخطوف اوشهيد اولازمه العده
ترضاهه اليتيم ايمر عليه العيد
ودموعه فواتح ناصبه ابخده
گلي ابياذنب كتلو ابوه اوليش
كوم اعيال عده اوكلشي ماعده
اوگلي ابيابخت جابوه ابغير ازنود
للجابت عمرهه امچلبه ابزنده
جرحك مثل جرحي اوبلوتك بلواي
وصوابك اصوابي اشلون ماشده
ناوشني المحبه اوبوسة التجبير
خل نگطع نزيفه ابلسم الوحده
الك هزني الحنين اودمعت العيون
وادري ابجفن عينك هم علي نده
اشگد مشتاگ امر للاعظميه اليوم
والنعمان ازوره اويمك اتغده
اونعبر عالجسر نتمشه ايد ابأيد
يم باب الحوائج غيضنه انهده
لاخير ابوطن ماتغفه عينك بيه
اولاخير ابشعب مايعبر الشده
م
**************************************************
