خلص حيل الصبر وك رايد ارتاح
وهدم كلبي التعب من حبك انته
كضيناهه سوالف بين العيون
وشفايفنه بخجل كضتهه سكته
كبل حالف جنت ماعيد الاشواك
ومن شفتك ولك كل شوكي عدته
كلت اعجاب يمكن باجر يزول
وميدك باب كلبي ولا عتبته
وطبعا انته مادكيته للباب
كلبي وبابه بعيونك شلعته
سوولك سحر رادو يصيدوك
وسحرهم من وصل يمك سحرته
اني بلا سحر بس شعري وياي
ولو ما انته صدك ماكتبته
من دون البشر كلبي شعر بيك
لحن انته وانه اتصور شعر بيك
حرت بسمك ولك حاير شعربك
اعربك فاعل بحبك اذيه
لان شهور احبنك واهم بيك
ومن كد حسنك اتصور وهم بيك
لو كلك الم صدك وهم بيك
ادير الامك وهمك علييه
لان ماعوفك اني وكلبي وياك
تذكر لو اذكرك من شلعته
وابد لتضن حبل امالي مكطوع
تره يطول بعد كلما كطعته
مر بينه الشته بردانه دنياه
سترة صيف لابس من بردته
لمح وجهك شتانه وشبت النار
بضلوعه وحرك فوكا سترته
يمر من يمي خصرك واشتعل حيل
لعد شيصير اذا خصرك حضنته
يمكن عادي بس لو ترحل شلون
خصرك ياخذ جفوفي برحلته
مريض وجفك الوحده دوه البي
يل بطولك صدك داخت دول بي
وانه بخصرك شكول اكثر دوه البي
كل واحد لمح خصرك خطيه
(صهيب السامر )
**************************************************