مايحتاج تشرح كلشي بيّن بيك
ما لايك عليك وياي دور الخل
ياحفنة ضوه ..انطشت بجف الليل
اذا رايد تسولف سولف اعله الظل
(خلك منجل )بجفك وانه اعرفك زين ..
تقنعني ...وتكلي وياك جاي اشتل
حسب ظنك من اعطش راح اردن ليك
ماتدري العطش بيه يقوه سم الصل
النخله الماتذب وافر ثمر عالكاع
بعد لتظن رطبها اعله الكرب ينزل
واليقلد الشمع تقليده بيه اشكال
لازم من يقلد عالشمس يعدل
حجيت بظهري جلمة بصوت مامسموع
لان تدري الحجايه البظهر تكتل
كتلك والسوالف جانت الهه عيون
اذا يرتوي المنجل يعطش السنبل
كتلك والشمس جانت بلايه انكاب
خيل الشوك بالحب كل وكت تصهل
لاتكسر غصن للعشك سويناه
موكتلك تعثرك شهكة البلبل
كتلك عالفراش ايموت من يختاض
اذا شاف الحدايق بالورد تشعل
اشد جبت العمر بحبال ودنه الفات
وانته بكل برود اعصاب جاي اتفل
جنت (اسم الله) اصيحن كون ظلك مال
ويمك من طحت ترس اذني صوتك حل
هواي اهات بيه وانته كلك صوج
واجروحي البروحي اعليك كلها اتدل
ماترهم علي من الالف للياء
خلص دور الموادد بعد لتمثل
الحمام بصحن حبك شال بيده اسلاح
اشلون تريد منك كلبي مايجفل
منقول
**************************************************
