ما مرتاحه انتي
وانه مامرتاح
جا وين اضمج
يا بعد عمري وكل سنيني
ياشوك اهلنه وكل حنيني
ياشمس الصبح يانده
يا نار الشته ...والليالي البارده
تموز انه
وانتي النسيم العذب
مو انتي وسط الكلب
ومجلبه بالسباح
مامرتاحه انتي وانه مامرتاح
الج فجيت الجروح المندمله جانت
واعله كيفي
وبكل هدوء
وبهيده بيه
وبثنين اديه
حضنت حبي ونيمتها اعله الجراح
مامرتاحه انتي وانه مامرتاح
حضنت حبي لاجن مدري شنهو الصار بيه
اشو كلبي من الصدر صيح عليه
كال كافي
ولك ييزي عاد
ماتبت ماجزت ماكفتك.....اد
لو نسيت اللي قبل عشره وعشره من السنين
ذيجه اللي جان اسمها افراح
مامرتاحه انتي وانه مامرتاح
اصفنت و دولغت وجريت حسره
حسره جانت نار كبرى
جرجت كل زراديمي
ويبست اثنين الشفايف
وحركت احليكي
وجرت اذني وتوبتني
وكلت كافي للنياح
مامرتاحه انتي وانه مامرتاح
عمي عوفيني لخاطر الله وكل ماتعبدين
انه والله ماا نفعج
انه زلمه بلا عواطف..... انه بس انين
انه
انه ذكرى مهموله وطوتها السنين
انه
انه يتيم انه ومحد بحاله ....ماعرف شنهو الحنين
انه
انه مهرفل انه خو انتي تدرين
خاف اجرحج ...خاف اعذبج
خاف اعلمج اعله النياح
مامرتاحه انتي وانه مامرتاح