اروع الابوذيات لمجموعه من شعراء العراق
عريان سيد خلف
وحك البالمهد ربة .. وحالة
الدنية وياي للهامة .. وحالة
صديقي هد علي جلبة .. وحالة
الجلب رد وصديقي الهد علية
حسين الساعدي
تِنيتَك عمري كَله اسبوع بس تان
وتئن روحي عليك وبقت بس تأن
تريد الواحتك يل بيك بَستان
واَفرهد كل ثمر ناضج بديه
ستار اللامي
بدمع عيني كتبتلك .. خاطر انة
والك ما يوم كاسر .. خاطر انة
غير انتة تجيني .. خاطر انة
اجيلك معتني زحوف على ادية
رياض الحار
الرقي صار الجنابك .. برتقالي
وعلى الحاضر حويتة .. برتقالي
اذا انتة مزاجك .. برتقالي
تكتر لا تذب ضيمك علية
مجهول
هلة يالكل عشرتي وياك .. ماسات
واسكر لو شفاي شفاك .. ماسات
الك خدين بيض تكول .. ماسات
من ابوسك ينعكس وجهي علية
شاكر التميمي
الكلب سلمتة بيدة .. واردة منة
وحال الثكلى حالي .. واردة منة
اجتني بيوم صوغة .. وردة منة
طبت ماظل بعد كل مرض بية
علي الفريداوي
حضر سويت لاجلك .. من حضرتك
ونسيت انتة وكفتي .. من حضرتك
ورة خشمك تكللي .. من حضرتك
حضرتي ان جنت امر تاخذ تحية
حسين الساعدي
اَبد ما كَلبي غَير بيك راَيه
وشفت بيك ابمنامي اَمس رُأيه
كَأن الحربي أنتَ ارفعت رايه
تعال وخلنه نتعاون عليه
عريان سيد خلف
اذوبن لو عيونك علي .. تنصاد
وشما توصل لحي مصدود .. تنصاد
اذا انتة التعرف الناس .. تنصاد
اذن انة الغشيم شلون بية
عريان سيد خلف
لساني كبال حلو الطول .. لك لك
واحذرك لا تكول النوب .. لك لك
لغيرك ما يصير الكلب .. لك لك
لان انتة شراكة وياي بية
عريان سيد خلف
البدر لاح بجبينة .. والا ليلة
وفر هذا البشعرك .. والا ليلة
عشت ليلة بحياتي .. والله ليلة
غلط بيهة القدر واهداك الية
عريان سيد خلف
علي سهام وكتي النوب .. ينجال
وما ظل عدل بالميزان .. ينجال
سألتة لحم اخوك الميت .. ينجال
يكللي الوكت شرعا حلة اللية
حسين الساعدي
كَض سجين والدلال وَذره
واخذ وياك من اتروح وِذره
لون انطحن وسط الريح واذره
اَرد انجمع بس تسأل عليه
عريان سيد خلف
تصدك لاني من وشرك .. وصنفاك
وتأدب عاد وي غيري .. وصن فاك
انة الصعدك باية .. وصنفاك
شلون تبيع مالاتي علية
عريان سيد خلف
الندم لا ينفع بوشرك .. ولاساف
ولساني ما غلط مثلك .. ولاساف
تظن عالي ؟ واشوفنك .. ولاساف
اقل من اثر شاة على الوطية
رحيم المالكي
ترف يالصورك ربك .. من العين
اخاف عليك من تمشي .. من العين
انا معذور يمدلل .. من العن
ابوك الخلفك للناس اذية
هيثم سعود
اللي موال خلي .. بستكانة
وشكر ذابت شفافك .. بستكانة
امس بالطيف كتلة .. بستك انة
من اهد ما كتلة ما راضي علية
رحيم المالكي
انعة عليك صدك .. منعة منك
ومنحت الكلب يرفض .. منعمنك
طامع بية ثاري .. من عمنك
شور الكلب بيدك مو بدية
هيثم سعود
هام العكل من شوكك .. وجن بيك
وشبيه الكمر من يضون .. وجن بيك
ابوسك لو يحبسوني .. وجن بيك
اوامر من وزير الداخلية
حسين الساعدي
اعزاز اعزاز ياما راحوا النه
وعليهم عمري كَله راح اونه
اشوفن للشماته راحه والنه
قهر ودموع والونه الخفيه
رحيم المالكي
عليك الدمع ما بطل .. وجاري
هلي ملو كثر نوحي .. وجاري
العلي ما صار بالدنية .. وجاري
صديجي والعدو طبكو علية
رحيم المالكي
اغيم وامطر وانخبط .. وصفة
على اللي راح مني وتاه .. وصفة
حبيبي وجان اللي البلواي .. وصفة
اشك الجفن لو مر طيفة بية
رحيم المالكي
يسامي الجيت ابشرك جيب .. بشراك
بحقل الغام روحي صفت .. بشراك
انة مدوهن وبية تلوم .. بشراك
يعمي الطعن بالميت خطية
رحيم المالكي
اكو وادم بخت ماكو .. ولا حظ
اخافن كمت من عدهم .. ولاحظ
يشامت عاين الحالي .. ولاحظ
صرت عودان وامشي على الوطية
سمير صبيح
الدنية شكد احبنهة .. وابرهة
تزرفني بمخايطهة .. وابرهة
جاعت ناكتي واكلت .. وبرهة
الدرب طول واخاف ترد علية
رحيم المالكي
يكلبي ما نفع تعبك .. ولا رباك
وحصتك صارت الدوخة .. والارباك
بطريقك بعد ما اعاين .. ولا ارباك
من اطيعك هم تردني الحفر حية
**************************************************
