اجمل اشعار ضمير الحب
يا كل شي بحياتي يا أمل دنياي
يا دمعة فرحتي بضحكة احزاني
يالحبك خرج عن طابع المألوف
من كَد ما أحبك غار مني اني
عن هاي البشر واضح فوارق بيك
عنهم تختلف من قاس ميزاني
أنواع شكثر من العشكَ تعنيك
حب من نظره أوله ومن طرف ثاني
ولو ناسي بعد ذكرنه أترجاك
حتى يعتذرلك حتى وجداني
ما كَلك أودك لا ولا أهواك
ذايب بيك دور راح تلكاني
وما كَلك حلو يا عاطفي وشفاف
بس ممكن اكَلك انته تسواني
شاعر من صرت أنته السبب أبهاى
صايرلي بحر كل فكره بوزاني
يا أسمي الثلاثي واللقب وياه
يعني انته هويتي لليقراني
وما جامل أبد يشهد عليه الله
بس راي الكَلب تلكَاه على الساني
ما شايف شمس تطلع عليه بالليل
ولا شايف كَمر من غبشه صحاني
يعني انته الوصف والوصفه والموصوف
ما يحتاج انته القاص والداني
تباً للعشكَ تاريخه لو ينساك
يا بلقيس بس بعين قباني
أتمنه العمر ما يعبر العشرين
ولا باچر يجي وتكَول ينساني
بس خاين أسف تالي طلعت وياك
طيفك من يمر سهران يلكَاني
الحب اعتقد يملك ضمير انسان
وثق لو ما ضميره نبقه انعاني
**************************************************
