قصيدة تعبان مثل العشگ
تعبان مثل العشگ سهران مثل الليل
وتمرجحك بالگلب خلاني مالي حيل
لا انت تجيني ابحلم واتكحل اعيوني
ولا انه منك امل وهواي لاموني
سهران طول العمر ما غمضن اجفوني
بالحسره ليلي يمر واگضي النهار ابويل
تعبان مثل العشگ سهران مثل الليل
ياجفن كافي دمع مو جرحت خدي
هيمه او بعيد الدرب ومسافر الوحدي
جدامي مر الضعن واعداي بي تحدي
ضليت وي وحشتي سچه وهجرها ا لريل
تعبان مثل العشگ سهران مثل الليل
تعبني هذا الگلب بالعشگ باليني
خله الدمع سولتي والفرح ناسيني
كل يوم اگولن يجي ولفي ويداويني
واشرب نخب جيته وانثرحبابي الهيل
تعبان مثل العشگ سهران مثل الليل
انه وحبيبي مثل طيرين بالجنه
نتشابگ اويه الهوى ونعبر منازلنه
نحلم ابليلة فرح وبشمع وابحنه
نشهگ ابعالي السمه وي نجمة سهيل
تعبان مثل العشگ سهران مثل الليل
جاستنه گرصة نده او عالورد نگطنه
التينه طگت نهد سال اعله حايطنه
من ضگنه طعم الدفو بيكم تورطنه
نمنا ابسواجي العشگ ننتظر مد السيل
تعبان مثل العشگ سهران مثل الليل
واتمرجحك بالگلب خلاني مالي حيل
الشاعر سامي عبد المنعم
**************************************************