في عتاب للزعيم الخالد عبد الكريم قاسم
منك .. ماهي منّك طب حراميهه
لعب بيهه وخبطهه وشرب صافيهه
كَلنالك تحذّر ناوراك الذيب
داعيت الضواري وأمّنت بيهه
يمصدكَ الاوهام امن البخت حفّاظ
يا حظ .. يا بخت .. لو طركَ سركَيهه
ثورة تفرغصت من بين حلكَ الموت
وبدمّك خذتهه شلون تنطيهه ؟
شفت شلون عثرت وانجفت ع الكَاع
واتعلّة بسرجهه تراب رجليهه
صدّكَ مو ملامة وتعدّاك اللوم
بس جمرة عذاب اتمشكلت بيهه
يا سيّد العفّة ويا نزيه الروح
ويارمز الشجاعة الحد تواليهه
يملاكَي الرصاص اعيونك مورثات
زلم الغدرتك .. ماظن زلم بيهه
الزلم تولي وتعف وانته الطركَت اركَاب
جان الموت حكَ امفصّل اعليهه
وجان الوطن يلهب والجموع اتصيح
اعدم ... والخطورة اتساهلت بيهه
ومن ضاكَت عليك انتفض شيب وشاب
ليل وحزب عادل جان حاديهه
اهي غضبة شعب ثار اعلى راس الموت
وشبّت نار كبرة اشلون تطفيهه
وشفت الكاظمية .. وشفت الكريمات
وشفت الشاكريّة وكل محاريهه
وشفت الميزرة ومذبحة باب الشيخ
وعكَود الكرد وشما حواليهه
بغداد بأسرهه شما حوت من ناس
شالت رايتك وتريد راعيهه
يا شاطر غلطتك كلفتنه ارواح
والغلطة الجبيرة اشلون تمحيهه
يا غرّة بياض ابكَصّة التاريخ
جسدت الرجولة بكل معانيهه
لاكَيت المنايا بهيبة الفرسان
ما دوّرت حفرة وعفّنت بيهـــه .... !
يل كَبرك صرح بكَلوب كل الناس
شلك بالكَبور الرجل تاطيهه
من روائع....عريان السيد خلف.
**************************************************
