يطبع الماي
انا بلياك مثل الكَاع.... اذا ما احضنك اتفطر
غده ميل انتظارك سيف ... وانه بكل كتر منحر
طفت روحي وظلامي ازداد
غطيت الشمس بالليل ... صعبه بغيرك اتقشمر
الامل كَد ماكبر شيب .. وكَام بكلشي يتعثر
تناقض بيه ماينكَال .... اكرهك والتفت واشتاكَ
اشكن صورتك واندم ... وارد لطيفك اتعذر
ضميت ومالكَيتك ماي ... شربت اخر عتب مافاد
نويت امشي واذبك غاد .... يم اخر جرح واصبر
واكَل لرويحتي تحملي .... كَضه موسم حنيني الجايج نسيان
بس المشكله بطاريك .... كلما يرجع اتذكر
يل بعمر الورد ضليت ...انه عمري انربط بالليل
يكبر والصبح يزغر
خذاني الموت مالك جيه يم كَبري؟
بس فكر تجي ولتخاف
اشكَ جفني واجي ابالك
انوي ومو شرط تحضر
واذا نيتك صدك ياريت
تجيني ووعد تلكَاني ... عله باب المكَبره موزر
اعزبلك نخل بالصيف ... اجيب فياي مدري منين
اخاف عليك لا تحتر
عرضوني بغيابك ضلمه عد عميان ....وصاحو بيش يتقدر؟؟
واجه الشراي قيمني ..وتلمس جروحي وكَال
بالميت اذا يسوه... اذان بديره الكفار ...سعره ومايجيب اكثر
كَضه عمري وانه وطاري الفرح صحبان
اموت بلا هوه المعشر
اناشغ بس اضحك البلكَبر مدفون
واسوي الماتشيله عقول
ادكَ جدمي عله باب جفاك
وارسم وجهك بمكَفاك ..... واحلف كَلبي ماينساك
ويمر طيفك يشضيني
عله حايط عشرتك تذكار
وانه شحصلت غير الطيف
اهي مره تفز عيني.... وعشر مرات تتبسمر
اعتب ع الدرب من خذك مارد بيك
ماترهم واتبعك وين... اجي ولا ترهم اتكتر
لمتحف دربك اتعنيت
بلجن محتفظ سهوأ ... لاثر من جدمك الهيهات
اشوفه بدربي يتكرر
اروحن وين من طاريك
حقل الغام اليكَصده .... غصبا ماعليه يحذر
من انكَل جدم سالفتي.. عله غيرك عمري يتوذر
ما اطمع واريد انساك
انه شفايتلي واتناساك
نعمه وكَلبي يتمنه ... وحرام ان جان يتبطر
يل مغيم عتب لاوين... حدك خاطر اتنطر
عله بالي شما يمر نسيان
اذكرك والعن الشيطان
متى تفك قيد ذاكرتي ... وخيالي الماختم قصتي
ذنبي وماعرفت انسه .. وكمت كلما يلومونك ... اكلهم والله ماقصر
شبيدك خاطر تسويه
حابسني بسجن مفتوح ... انه الما اعرف اتحرر
عشت مثل اليتاني اعدام
لابس مغربيتي ثياب...بقلق من خطوه السجان
تخطف لون البوجهي ... وغصب تطيني لون اصفر
اليلوم بلا سبب معذور .. اهو الساكن ابيت الشوك
يدري بحال التهجر؟؟
بامل نيتك بقيت اتناك
واقنع عيوني اكَلهن جاي .... وكَلبي يكول يتاخر
ولو شيفيد لو رديت
علكَوني بحبل طاريك...وكبرو صورتك بالطيف
واخذو حلمي من عيني
ومتت من سدو المحضر
منقول
**************************************************
