قصيدة وارد للناصرية ردود - علي الجبر
( وارد للناصريه ردود )
والاگي الدنيا متغيره
وثوره تهلهل الثوره
واشمّ ريحة وفه وبارود
تهب من غيرة الشطره
واطشّ عـ الرفاعي ورود
واشهگ واغص بالعبره
وامر عـ النصر مشدود
براية وطن منتصره
وازور الـ جلعه ويـ الفهود
بحنين وشوگ وبحسره
واسيّر عـ الفجر والبطحه
موعود
جنّه بعين عاشگ تصبح
الصحره
واسلّم عـ العكيكه واور
محسود
كلمن شاف اهله وديرته
الحرّه
وانزل للـ چبايش گلبي
ممرود
غريب وجابته العشره
واتنفّس هوى الـ غراف
مگرود
ذاك الـ ماشبع من طينته
ونهره
واطير بجنح فوگ الـ طار
معگود
واطيح بـ گاعنه الخضره
واركض للاصلاح واكد
مهدود
واشوف الگرمه متحضره
واحفر
للدمع مجرى من الخدود
يصب بسيّد دخيل
ويعدّي على الحمار ويعبره
واصرخ
هاااااا ... يالولاد ...
منجل بيد حاصود
يحشّ نعناع بـ الدوّايه
والفضليّه ويعصره
واشوف
السوگ مثل العود بالجود
يمطر حزن ويطشره
واشرد وابتعد
والنوب ارد اردود
والمشتاگ .... شيصبره
**************************************************
