(رحيم المالكي )
هذه القصيدة التي تسببت في مقتله
يقول فيها : بعد أن عجزنا عن مخاطبة الشرفاء لحل مايدور في العراق،
إضطررنا لمخاطبة غير الشرفاء.
ياهو المنج أشرف خاطر أشكيله
دليني ياحسنة وباجر أمشي له
أمشيله وأحجي كل الحجي المضموم
كَبل حفاي كَالوا هسة ماكو اهدوم
بيتي من القنابل والقصف مهدوم
وحكومة بلا حكومة بغير تشكيلة
تنازع على الكراسي والشعب حفاي
وأبشرج لاغذاء لاكهرباء لاماي
إحنا أهل النفط والكاك عد زلماي
ياحسنة الحكومة تكَدر اتشيله
------
حكومتنا الرشيدة لييش هالتأجيل
أي مو مطرت علينا من السما سجيل
بلوة أبتلينا قابل إحنا أهل الفيل
أي مو هذا أبرهة خلوه يرد فيله
جوعنا أبرهة وجوع أبو الكفار
تلث اسنين أسمع ماأشوف إعمار
بس بعض الحكومة أصبحت تجار
بهاي أشهد ياحسنة ابيوم وليلة
--------
تجار الحكومة والشعب حمّال
وياهو اليجي باجر نغير الحال
من هاية السوالف حملنا اجمال
إذا إنعدل وضعه ينعدل ذيله
حكومتنا الرشيدة لييش هذا البوكَ
ترة لهذا الشعب قط ماتضيع احكَوكَ
باجر بإنتفاضة إنشكَ كثير احلوكَ
عرفنا الباكَنه ونعرف اليوميله
[center]
