¸,.-~*محاورة شعرية بين فتى وفتاة
هي
عندي قلب مايقسة
وعندي عقل ما ينسى
وعندي احباب يعجبني
اتحارش بيهم هسة
هو
تتحارش ويه الروح ساكنهه انته
والكلب يلهج بيك هلبت رحمته
هي
يا حروفي ارحلي
واحملي حلو الكلام
وان وصلتي طمنيه
وبلغيه احلى سلام
هو
ما وصلن حروف الكلب
انتظر ودموعي تصب
يا من خذت كلبي غصب
متحلي هاي المشكلة
هي
عاتبني لو حسيت لحظة انة ناسيك
يل تسري بين عضاي
جا وين اخليك
هو
تسلملي كل اعضاك يسلملي كلبك
ما قصرت وفيت كل ما اطلبك
هي
صحبتنة مو بالحجي
ومو بالضحك والبجي
صحبتنة حايط صلب تكدر علي تنتجي
هو
يا حايط الاحباب يالعالي سورك
كلما امر مناك لازم ازورك
هي
صافي وبعدني وياك اصفى من الاول
لاتظن كلبي وياك خان وتبدل
هو
كلبك ذهب تيزاب ما بدله بالكون
معقوله يالمحبوب تتبدل تخون
هي
لاتظن حي وانساك دوم انت عالبال
هم شفت واحد عاش لو كلبة ينشال
هو
كلبك لون ينشال انطيك كلبي
وبجسمي دمي يدور جي انته حبي
هي
كون انكلب نفطات
ومحبوبي صوبة
نشتعل اني ويا
وننسى الرطوبة
هو
تنسه الرطوبة شلون وبيا طريقه
بنهر الغرام نفوج هاي الحقيقه
هي
بالكلب ما ناسيك
صورة الك راسم
حب من عهد الاحباب
موحب حواسم
هو
كليبي يلهج بيك هاي الردتهه
ورويحتي بيمناك يالحوسمتهه
هي
من ارسل الكلمات
ماتشفة الجروح
كون من ادوس ارسال
ارسلك الروح
هو
ترسلي روحك ليش هيه بعيده
روحك بنص احشاي اروع قصيدة
هي
احس الكلب محتاجك وطول البعد جارحني
انا اسف لازعاجك بس الشوك ذابحني
هو
شوك الذابح احبابي
كلساعه يدك بابي
وكل ساعه افكر بيك
اخاف العشك جذابي
هي
شلتك دمع بالعين بيوم العرفتك
ومحد وصف محبوب بكد ما وصفتك
هو
يا دمعة المحبوب بللتي روحي
من كثر شوك البيج طابت جروحي
هي
الدرب صار بعيد واشتاكت الروح
والكلمة بالنقال ماتشفي الجروح
هو
كل الجروح تهون بس جرح حبي
لو ميت الف نقال ما تشفي كلبي
هي
لاعيني ترضى تنام
لاكلبي ينساك
اصبر واعد ايام
واتمنى ملكاك
هو
تصبر تعد ايام تتمنه ملكاه
رمشله مره وشوف بالباب تلكاه
هي
صدكني ماناسيك دوم على بالي
هم شفت مرة نجوم تنسى الليالي
هو
انه عله بالك دوم وانته عله بالي
عندي النجوم شهود ويه الليالي
هي
تدري شكد عطشان كلبي على ملكاك
ارتوي بلا ماي من اكعد وياك
هو
يل ترتوي بلا ماي من اكعد وياك
اخذ الكلب والروح كفاني ملكاك
هي
حبك سكن بالروح حوسمله قطعه ...
سوه الضلوع سياج ياهو اليطلعه
هو
كون انقلاب يصير وادخل حواسم
بس هوه حصتي يصير ثغرك الباسم
هي
ظلمة وتدور عليك روحي شجاهة
متولعة بيك سنين خلهة بهواهة
هو
متولعه بيه سنين روحك الحلوة
حبك يرد ويروح باليني بلوة
هي
عود ابتعد وانساك كل هذا ظنك
والله الكلب كلساع يسألني عنك
هو
يسأل علي كلساع كلبك وقابل
مو كلبي بالدكات عنك يسائل*·
**************************************************