كش ملك.تاج اعله راسه
يخاف من تاجه يطير
وكش رئيس..المو رئيس..
بغير شعبه يستشير
وكش وزير..الجان يحلم
يوكَف اباب الوزير
وكش امير المايساويله
سعر رشمة بعير
وكش زغير الصار
بالقدره جبير
وكش اذا صار الوطن
لكَمه حلال اعله الغريب
وكاس شربت من عصير
وكش اذا فوكـَ الرصيف
ايموت شاعر لو مثقف
اغتالته طلقة حرامي
ينزع ويلبس حرير
هاي كلهه ماتساوي
لحظه من موقف عراقي
ابين روحه وعيشته
ونفسه يحير
هاي كلهه ماترجع
ثمن دمعه
اتطيح من جفن الفقير
اشكَد فرق بين الاصابع
شمع ذابت حالبه
وخبزه للوادم تصير
اشكَد فرق لليكتب
بروحه قصيده
تبات دفتر عشكـَ
وياك بسرير
اشكَد فرق لليرسم اقلام الرصاص
فوكـَ رحلات المدارس
جناح فخته املون
وبالحب يطير
اشكَد فرق لليسهر بليل ويفكر
يرسم الضحكه وعصافير وبلابل
وشمس بالظلمه يصير
اشكَد فرق للكَضه ايامه شريف
وكصته بيضه
يفوح من عدها العبير
اشكَد شريف الباس
بسنيني العذاب
اعيون شعبه ويظل عاشكـَ للأخير
اشكَد نضيف
اليظل بفصول الزمن
ثوبه نضيف
الماركع بس لاسم هذا الوطن
ولله سبحانه القدير
**************************************************
