اعيوني امساهرات الليل لعبد الواحد معله النجفي
عيوني مساهرات الليل وعيون الخلك نومه
على ولفه اليريد اينوح ليش الوادم اتلومه
×××××××××××××××××××××
اكتابك من وصلني اوبيه تنشدني على حالي
لاني من الهوى نشوان ولاني امن الترف سالي
اكضي ليلتي سهران ونامت عين عذّالي
ابات ابليلة الملسوع اغذايه بس ونين وروع
متوسد جمر ودموع
الخلك هل الليل جل حارس امخليني على انجومه
×××××÷××××××××××××××××××
اراعي النجم طول اليل اراعيه بقلب ولسان
ينجم الليل متكلي ليش لهل وكت سهران
جن آنه الهوى فتني ودعاني مسهر اولهان
هم انت الهوى صابك واللي نابني نابك
وهم ملّتك احبابك
وهم مثلي بسلامتهم الكلبك زادو اهمومه
××××××××××××××××××××××
لاموني او ملوني ورموا كلبي بسهم فتاك
جفوني كل اهل ودي هلّي ساهرت وياك
ارعاك او تراعيني وعيني شابحة لعيناك
واحسب ضيّك اليسري دمعت عينك التذري
مثل ادموعي التجري
حكك لو جنت تهوه الهوى هذا الذي ايسومه
××××××××××××××××××××
الهوى فتنه بحكم شرعه ودعانه بالونين انبات
نحلان وغده بكواي يهدم معول الحسرات
لو حسبه غدت عني تخلفها عشر حسبات
تجي حسبه تسليني تاخذني اوتوديني
وتر حسبه تخليني
مثل ام الوحيد الراح عنها وبكت مالومه
××××××××××××××××××××××××
يصاحب حالتي هذي اومن عدها اصيح الداد
العت من النجف بالهم كلت اسله الهوى اببغداد
الذي من نوشته يخلص النوشه يعتني وينصاد
كلت مالي كلب يهوه جه لن بالهوى اتجوّه
اثاري للحسن قوّة
قوّ!ه على البعد تجذب مو باللمس محكومه
×××××××××××××××××××××××
قوّه ا و جاذبيّتها مصدرها اللحاظ السود
اعتنيت اشراكها برجلي خاف اتظن خذتني ابجود
بس ماصارت بالنوجه صحت يامن يردني اردود
اصيح اومابكالي راي وحشم خلتي وخواي
ماواحد سمع نخواي
بس منهم سمعت اللوم اوعندك هاي معلومه
×××××××××××××××××××××
يروحي شما تريد اتلوم خلها ، امحال تردعها
يدولبها الهوى العذر ي وهوى ليله امولعها
انا اشماكول عل السلوان احملها او اطبعها
جذب وارجع مثل ماروح وزيد على الجروح اجروح
مااملك رسن للروح
الما يملك رسن بيده ايصير ايجول بالحومه
**************************************************
