زيف البدايات للشاعرة / هبه البسيوني
يمكن زمان بعدِت عشان
ملقتش فيك
ولا حاجه م اللي وعدتها..
طاب هي فعلا اللي بعدت؟
ولا انت اصلا بعتها .!؟
جايز تشوف نفسك ملاك..
جايز تشوفها هلاك.. ونار
بس السؤال..!
هو انت امتى فهمتها.؟
ولا انت امتى ف ضعفها
قوتها بيك..؟
كان يبقى كل الجرح منك..
تشكي منك
بس ليك..!
لما أنت اصلا "ماشي" ليه.!
تشبك ف قلبك قلبها.. ؟
لما انت قشه ف موج محيط
بالقش ليه علقتها ..؟
لو كنت فاكر إن القلوب
حُرمتها سهله.. !
أو جه ف بالك
إنها للدنيا جاهله..
وإن انت روميو وشهريار..
بطل هزار..
ترابيزه الآه والألم متحركه..
الدنيا فيها كاسات كتير
وكاساتها ديما مُربكه..
بتلخبط الكون والكيان..
الرحمه بس تجوز عليك
بتجوز على القلب اللي خان..
كلمه خيانه القصد بيها
مش بس رُحت لواحده تانيه!
أنا قصدي بيها إنها
لو جات ف حضنك بس ثانيه..
تبخل تحسسها بأمان ..
اوعاك تفكر يوم ما ترجع
هتلاقي شوقها بتاع زمان..
البنت يوم ما تقول هتنسي
راح تنسى إسمك والمكان..
وملامحك السارحه وعنيك..
والدقن لو بتليق عليك..
أو حتى لأه..
كل اللي باقي ف قلبها
كام ألف دقه..
محتفظه بيهم للزمن..
يمكن تلاقي ف يوم أمل
فتعيش عشانه..
أو طفل واخد لون عيونها
ويكون كتير يشبهلها
وميكونش شبهك..
ولا حتى فيه من قسوتك
ولا طبع قلبك..
جايز تكون كات عارفه امتى
راح تنتهي كل الحكايه..
وإنك هتاخد
دور البطوله ف فيلم.
وعارفه برضو إنها..
ف شريط حياتك
دوبلير ف تتر من النهايه..
بس إحنا ديما طمعانين
ف التجربة
ونسينا إن القصه
متعتها البدايه..
وان البدايه
ف الأصل خطوة صغيره
لا عليها ترسم سكتك
ولا تخترع مشهد نهاية..
ترابيزه الآه والألم متحركة..
الدنيا فيها كاسات كتير
وكاساتها ديما مربكه. .
بتشقلب الكون والكيان
الرحمه بس تجوز عليك..
بتجوز على القلب اللي خان.
**************************************************
