مل مني القلم ومن القلم مليت
مل مني القلم ومن القلم مليت
عمت عينه قلمنه الما نفع شعره
تعب حته الشعر ويه العراقيين
وصار بحال اهلنه وبالعراق ادره
رسمت حروف العراق برسم فنان
وجمعت اربيل والانبار والبصرة
وكلت لازم حروفي توحد الخوان
ما معقوله هيج تصير فد مره
ورديت ولكيت دموع عالوجنات
حروف الي رسمتهه اليوم متطشرة
كردستان تحجي بزودهه وتكول
احنه العاصمة وبغداد متاخرة
والانبار شالت سيف عالخوان
لو ليه الحكم لو فلش الاسرة
والبصرة تكول احنه انريد اقليم
ومن نفط العراق الكم فقط عشره
وشفت للفتنه والله العراقيين
دون حروف جر ياناس منجره
مذبوحة المحبة وناس تكره ناس
سويه الي يحب والقايض الجمرة
حتى الورد مايرضه بعد بالماي
ومن دمنه تريد الوردة والشجرة
رقم جبنه قياسي بالقتل والموت
وصرنه اول شعب نص اهله متهجره
نهر دجلة ياناس من الجثث غركان
خلي نمد ادينه لدجله وانجره
على جثثنه ادور هالفضائيات
ياهو الي يصور ياخذ الاجره
معصوبه العيون مجتفه لايدين
وانواع الرصاص يجوب بصدره
لااهله اجوي ولا جفنوا بجفان
مجهوله الهوية ومن درة بامره
اذا امه الحنونه الصايمه برمضان
ما اكلت اكلها وبقت تنتضره
تنتضره يرد وتريد تحجي وياه
اثاري العيد لازم ينكطع مهره
لان باعت ذهبها بشارع الصياغ
حتى اتزوج ابنهه الما فرح عمره
ما نامت بقت سهرانه كل اليل
ايا ليل العراق الما بزغ فجره
وما اجاهه صبر طلعت تدور عليه
مثل طلعة حمامه بعينهه العبره
وما شافت ابنهه وجاهه ملك الموت
تعرف شنهي يعني تموت بالحسرة
معناها الفرح صاير مثل رجال
شايل ورده بيده وخنجر بضهره
معناها عراقك كاتل ومكتول
سوده كلوبهم وعقول مفتره
وكل هذا ويكلي احنه العراقيين
سنه وشيعه عشنه الحلوة والمره
لاوالله جذب احنه العراقيين
سنه وشيعه مثل الضره عالضرة
ملينه الجذب وليمته وليادوب
واقع حال لازم نخضع لامره
ملينه الجذب وليمته وليادوب
قصايدنه اجت للناس متاخره
نعم اخوان احنه
نعم اخوان احنه وياك اني بهاي
بس مومن بعد تفجير سامره
بعد تفجير سامره العراقيين
مثل فلم رعب ودمايته الحمره
موفتنه صحيح الصير ابغداد
سونامي الفتن ابغداد منتشره
قتل مو عالهوية هواي متوهمين
صارت عالاسم كص راسه ويشمره
واليكلي تبالغ انته حيل وبهاي
جبت حجه ودليل وياي هالمره
اتحده بكر واتحده ابوالخطاب
افن واحد البيهم يوصل الثورة
واتحده علي واتحده هم حسين
اذا فلوجه طبهه ومنكسر ضهره
صفر كل النتايج للعراقيين
بس بالفتنه جابو عشره من عشره
هذا يكول سني ناصبي اغتالوه
وهذا يكول شيعي رافضي نكفره
ضلوه بهالسوالف ياخزي ويا عار
واسرائيل علكت نارها الكبره
يول وين الشرف كدامكم بغداد
شكوا ثوبهه واخذوهه متاسره
اغتصبوهه الكفر.......ما تسمعوهة تصيح
انه ام الشرف واليوم مو عذره
بعد والله ماينفعنه قيل وقال
لان كلشي انتهه وانكسرت الجره
مرحوم العراق استشهد من سنين
ياوسفه صفت اشلائه متنثره
متنثره بمزابل يمهه كوم اجلاب
اكلت من لحومه وما درت سره
صير وياي بس هالمره اترجاك
عيب من العراق اليوم نتبره
صعبه بمزبله جثه العراق تصير
خلي نشيله منهه وندفنه بكبره
م ن
**************************************************
