شما حطن شكر عالجاي مر يصير
فدوه شويه حط اعليه من عدك
خدك شاف خدك أمس جلب بيك
كظ خدك بحركة وباسك بخدك
بالطيف من اشوفك انه اصيح الله
أنت شكد حلو وحته أحله من كلك
ولوشوفك صدك وكبال عيني تصير
ما صفك بدية أبعيني اصفكلك
يلعايش بروحي ونه عايش بيك
شجاك وعلغدر دمرت الحساس
انه كلبي وفي وما يعرف يخون
لذلك تركتك انته والعباس
ماحب البعد حبيت اعيش وياك
حياتي بلا وجودك شنهي معناها
انه بعرسي حبيت اسمع الهوسات
هاي الرادها وهاي التمناها
تعال اكعد بكلبي وشوف شيصير
كل دكه ونبضه تصرخ باسمك
مو قران جيب الكعبه وياك
حتى احلف عليه شكد اني احبك
كلبي ينوح من اصد عين بعين
وشفت طولك حبيبي وثكلت نوحي
لو مثلك حلو جان ما طلعت الباب
يعمي وداعتك جان جومت روحي
تفاحات عدك حركن خد الزيج
بالله الياحلك لوردت تنطيهن
الجايع من يفرهد چن تعذره الناس
خل حراس يمك حتى تحميهن
واذا تسمع حظر تجوال ظل بالبيت
لان حته الحظر ظل صافن اعليهن
لا تسألني عنـك انت بيه تعيـش
تعال لمدن روحـي وعنـك اسألها
جانت قلعة روحي ومايطبها الجيش
لكن جيش حبك دخل واحتلـها
يمن بيك الجمال تعده الحدود
ومن خدك خذو لمعات النجوم
اشترينة هدوم حلوة الخاطر العيد
وانت العيد لجلك يشتري اهدوم
فدوا اتوسلك لاتزعل اترجاك
ولواادري بزعلتك انه راح انذل
خل انذل اولي يطبني ميه طوب
بس هيج ابحلاتك كفر من يزعل
عصفور العمر علمته توه يطيـــــــر
ليش ترده الي وجنحانه مشبوكة
صح أنت حلو بس لا تظل مغرور
أكو أحلى من الشكر وتذوبه خاشوكة
ياليل هم رجعت شتريد وك ياليل
من وحشتك شيبت و الحيل ما ظل حيل
مثل الرماد اشتعل و ابقى احترك كلي
من اذكر امي الصبح من تكعد تصلي
المثلك مايخلي تشوفه عين الناس
ايضم روحه يطلع بالشهر ساعه
لان اتعم علينه وملحدين نصير
اذا شفناك نكفر حته بالطاعه
باوع خدك الجنت انه ابوسه هواي
هم تذكرني لو غيرتك الفركه ؟؟
بوساتك بعدهه بصدري يمي تبات
وعطرك بعده يصعد بيه كل شهكه
سويتك علك وزورتك العباس
من كد ما احبك بيدي شديتك
خفت اتضيع مني وكل حياتي اتضيع
سويتك كلب وبكلب ضميتك
تهز كلبي بلسانك من تضوك شفاك
واذا ضكتك اموت بهزه قلبيه
من تضحك غصب تضحك شفافي وياك
عندي الحاله صارت لا ارادي
**************************************************
